Premios por partida dobre para o actor estradense Gabriel Branco

LOIS DOCAMPO - A ESTRADA O actor estradense Gabriel Branco "Monchi" recibiu dous premios en tan só uns días polo seu traballo. O primeiro destes premios parte da propia Academia Española de Cine, que decidiu conceder unha mención especial ao curto que Branco ha protagonizado xunto ao televisivo William Miller e que leva por título O cuarto centro dereita. Por outra banda, a súa compañía Ruta Show Company foi a ganadora do prestixioso concurso Escena Castelo.
No primeiro dos casos, Branco púxose ás ordes do director José R. Carralero nun curto no que compartiu o protagonismo central co actor coñecido pola súa actuación en series como Cóntame ou Aguia Vermella, entre outras, William Miller. Esta obra foi presentada ao festival Notodofilm. Malia que non se levou o premio, si que obtivo recoñecemento da academia de cine, que decidiu entregarlles unha mención especial nun acto que terá lugar o vindeiro martes.
Por outra banda, Ruta Show Company, a compañía do actor estradense, levouse un importante premio decidido en formato de eliminatorias. Nesta competición, o público e o xurado votan polas mellores actuacións para permitirlles ir superando roldas. Finalmente, a actuación na que participa o actor estradense levouse un primeiro premio que lles valerá un contrato para un mes actuando no Escena Castelo e mil euros en metálico. Ademais, contarán coa axuda dun productor que intentará promocionar e conseguir actuacións.
Tras ver ampliado o seu currículum con estes dous recoñecementos, Branco segue adiante coa súa carreira, nunha etapa de traballo constante. A súa seguinte actuación terá lugar o próximo día 21 da Coruña co musical Bobok, baseado nun conto do escritor ruso Fiódor Dostoievsky. Coa súa compañía teñen previsto participar o 21 de xullo no festival de Vilaxoán As Revenidas.
Branco valorou positivamente todos estes logros, que definiu como novos pasos na súa carreira. O actor estradense recoñeceu que agarda algún día poder actuar no seu pobo. "Estaría ben. É algo que nunca tiven ocasión de facer. Estiven en Vigo, A Coruña... pero nunca cheguei a actuar na Estrada".