Os donos de pisos en aluguer crecen pola boa ocasión de negocio

As inmobiliarias apenas teñen pisos para alugar no Salnés, e con todo o número de propietarios que arriendan vivendas segue crecendo. Así o apunta o Instituto Galego de Estatística (IGE) nun informe publicado onte, sobre a caracterización socioeconómica dos arrendadores galegos. No Salnés, había 1.872 propietarios con vivendas en aluguer en 2023, e o ano pasado xa eran 2.126, o que supón 254 máis que entón.

O mercado do aluguer na comarca arousá está caracterizado desde hai uns anos por unha gran falta de vivendas e a consecuente alza de prezos das que están no mercado. E moitos propietarios aproveitaron a conxuntura para pór pisos no mercado, xa sexa porque saben que poderán arrendalos con facilidade ou pola posibilidade de obter agora unha maior rendibilidade.

De feito, a peche de 2025 había máis propietarios en todos os municipios do Salnés que en 2023, fóra de en Ribadumia, onde baixaron de 91 a 85. No caso da Illa, a cifra baixou con respecto a 2024, de 42 titulares que había entón a 39 o ano pasado.

En Vilagarcía, o IGE contabilizaba o ano pasado 797 propietarios ao 31 de decembro, 104 máis que dous anos antes, cando eran 693. Tamén se produciu unha alza importante en Sanxenxo, outra localidade co mercado do aluguer moi tensionado polo seu interese como destino de segundas residencias. En Sanxenxo, había o ano pasado 421 propietarios de vivendas en aluguer, cando en 2023 eran 372, o que supón un crecemento de case medio centenar de persoas.

Pensionistas

Outro aspecto que analiza o IGE na súa investigación estatística é o relativo á actividade económica dos arrendadores. Por termo xeral, ao redor da metade dos mesmos son asalariados ou autónomos, pero tamén hai máis dunha cuarta parte de pensionistas, que logran complementar as súas pagas coas rendas mensuais dos alugueres.

No caso concreto de Vilagarcía de Arousa, dos case 800 propietarios de que tiña constancia o IGE a finais de 2025, algo menos de medio milleiro son persoas en activo, e 215 son pensionistas, o que significa o 27 por cento do total.

A porcentaxe diminuíu lixeiramente con respecto a 2023, cando os retirados supuñan o 28 por cento dos arrendadores existentes no municipio.

1,4 propiedades por persoa

No que respecta á idade media dos propietarios, no conxunto da comarca do Salnés está en 58,6 anos.

A poboación cos arrendadores máis novos é A Illa, cunha media de 53,3 anos, e a de maior idade media é Sanxenxo, pois se achega aos 60 anos.

Finalmente, outro dato que mostra a estatística publicada onte polo IGE é que unha gran parte dos donos de vivendas destinadas a aluguer contan con máis dun inmoble.

No conxunto da comarca, cada propietario ten de media 1,4 pisos; a cifra máis elevada é a da Illa (1,7 vivendas por persoa), e en Vilagarcía é de 1,3 pisos de media por cada propietario.

Subscríbeche para seguir lendo