«A Xuntanza moteira dá a coñecer a vila e é unha inxección para a hostalería»

O ruído de motores e o ambiente moteiro será protagonista este sábado no centro urbano de Redondela coa XII Xuntanza Moteira Vila dous Viadutos, unha cita que xa é un clásico entre as concentracións de Galicia.

Que previsións manexan para esta edición?

Habemos ir crecendo ano a ano ata o punto de considerarse unha das mellores xuntanzas moteiras. Se o tempo acompaña e non hai choiva creo que superaremos de longo as mil motos. En Redondela e a súa comarca hai moita afección ás motos e tamén en Vigo e Pontevedra, pero tamén vén moita xente doutras zonas de Galicia como Ourense, Santiago, A Coruña e ata norte de Portugal.

Que se vai a atopar o afeccionado á moto o sábado.

Un evento como este ten moito traballo detrás. A diferenza doutras concentracións aquí non hai inscrición e todo é gratuíto. Ofrecemos petiscos aos asistentes, unha mejillonada, música e, sobre todo este ano, haberá unha exhibición de freestyle con dous pases a cargo do portugués Paulo Martinho, que é un dos mellores pilotos de Europa. Recomendo a todo o mundo que veñan velo, porque é un espectáculo de primeiro nivel.

Tamén realizan unha ruta.

Se, todos os anos organizamos unha saída para dar a coñecer a comarca e ten moito éxito. Nesta ocasión sairemos cara a Pazos e Mondariz e regresaremos por Moscoso. É unha zona moi bonita con estradas de curvas e bosques frondosos, aos que non a coñezan vai gustar moito.

Como financian un evento así sen cobrar inscrición?

Con moito esforzo e dedicación por parte de moita xente. Tamén temos que dar as grazas aos nosos patrocinadores e ao Concello, que colabora coa carpa, luz, valos, seguridade... E unha das principais fontes de ingresos é o servizo de bar, con bebidas e bocadillos quentes durante todo o día.

Para o Concello esta concentración tamén é importante desde o punto de vista turístico.

Por suposto, porque damos a coñecer Redondela. Veñen centos de persoas que aproveitan para visitar a vila e arredores, e tamén supón unha importante inxección económica para a localidade porque moitos consomen nos locais de hostalería, que normalmente enchen todo o día.

Que ten o mundo da moto que cada vez hai máis afeccionados?

É unha forma de vida, para min é a mellor forma de gozar do lecer. Cando sobes a unha moto esquécenseche todos os problemas que poidas ter. Dá esa sensación de liberdade, de gozar da estrada e a paisaxe, que o fai tan especial. E tamén é importante ese bo ambiente que existe sempre entre a comunidade moteira, fanse moitas amizades compartindo a afección.

Cantos socios son no Motoclub?

Agora somos poucos, só vinte, pero chegamos a ser ata 64. Pero coa pandemia moitos o deixaron.

Ofrecen actividades todo o ano?

Organizamos rutas case todas as fins de semana e non fai falta ser socio para vir. Tamén imos a outras concentracións e organizamos comidas e ceas e temos varios eventos potentes como esta concentración e tamén a de Ponte Caldelas, a motocallada, a papanoelada...

Subscríbeche para seguir lendo