O 74% dos maiores de 80 anos xa se vacinou contra a gripe e o covid

O conselleiro de Sanidade, Antonio Gómez Caamaño, destacou este mércores os bos datos da campaña de vacinación contra a gripe e o covid. Fíxoo tras recibir a súa propia dose, destacando que a vacinación é unha das ferramentas máis eficaces para protexer a saúde, individual e colectiva, contribuíndo á protección das persoas máis vulnerables e reducindo o risco de complicacións graves.

Segundo destacou Caamaño, nesta campaña de vacinación 2026-2027, a inmunización alcanza o 74% no colectivo de máis de 80 anos. No de máis de 70, pola súa banda, sitúase no 57%, porcentaxe que descende ata o 38% no colectivo de entre 60 e 69 anos. No lado oposto, na poboación máis nova, de entre 6 e 59 meses de idade, a inmunización rolda o 58%, e o 32% no conxunto da poboación menor de 12 anos.

Tal e como recordou o titular da carteira galega de Sanidade, a campaña de vacinación fronte á gripe e o covid continuará activa ata o 31 de decembro para todas aquelas persoas que formen parte dalgún grupo vulnerable no que estea recomendada a inmunización, como mulleres embarazadas, coidadores ou persoas con patoloxías.

Este ano, entre as novidades da campaña destaca a ampliación da vacina antigripal de alta carga ás persoas de entre 65 e 69 anos, despois de ampliala na anterior campaña ao grupo de entre 70 e 79. Así mesmo, este ano a vacinación faise en 20 centros educativos máis que no anterior, alcanzando un total de 75 colexios.

Ao fío, Caamaño destacou tamén o estudo Combogal, que busca avaliar a mellor estratexia de vacinación fronte á gripe e o covid na poboación de 65 anos ou máis, comparando a administración dunha vacina combinada coa aplicación de dúas vacinas por separado. O empezou a mediados do pasado mes de outubro e, tal e como explican desde Sanidade, xa conta con máis de 14.000 participantes.