Begoña Caamaño será eterna en Vigo: unha praza levará o seu nome

Unha praza inaugurada en xullo de 2024 na contorna da peonil do Calvario levará o nome de Begoña Caamaño. Así o anunciou o alcalde de Vigo, Abel Caballero, durante a inauguración da exposición «Begoña Caamaño no Calvario vigués», formada por seis paneis con ilustracións, fotos antigas e textos do libro «A nena que perdeu un zapato na lama», de Ramón Nicolás, editado por Galaxia, no que o autor recupera a infancia da xornalista e escritora, que naceu neste barrio e se lle dedica o Día das Letras Galegas. Ubícase xunto aos números 136-138 desta rúa.

«Begoña Caamaño merece memoria eterna», proclamou Caballero antes de anunciar que a nova praza situada ao carón da rúa Urzáiz, na coñecida popularmente como peonil do Calvario, pasará a levar o nome da escritora. «O sitio onde ela se criou, onde creceu, vai ter a súa propia praza. A praza de Begoña Caamaño», sinalou o rexedor, que definiu o novo espazo como «unha praza bonita», integrada no entorno.

A mostra está comisariada por Ramón Nicolás e coordinada por Xesús Domínguez Dono, con deseño e a maquetación de Hayat Husein e ilustracións de Carlos Gallego, que asina tamén a parte gráfica do libro. Para a mostra, contouse coa colaboración do arquivo fotográfico da Asociación de Veciños do Calvario, co Arquivo Begoña Caamaño e co Arquivo da Editorial Galaxia.

Xosé Manuel Soutullo, director de Galaxia explicou que a exposición foi pensada para achegar a figura de Begoña Caamaño á veciñanza do Calvario, que foi o seu espazo vital ata os 12 anos. Ramón Nicolás, autor de «A nena que perdeu un zapato na lama» agradeceu a tódalas institucións a vontade por divulgar a figura de Begoña Caamaño e trasladou a súa ilusión pola homenaxe á autora, que considera «un agasallo» e pola colaboración do alumnado do IES Castelao. Beatriz Caamaño, irmá da homenaxeada, agradeceu o traballo que fixo posible a exposición, tamén o libro, e salientou a importancia de que «as novas xeracións» coñezan a figura e a obra de Begoña.

O alcalde aproveitou o acto para facer un percorrido pola transformación urbanística da zona que Caamaño coñeceu na súa infancia. Referiuse ás antigas adegas Bandeira, que, cando chegou á Alcaldía, estaban «medio derruídas» e que o Concello rehabilitou «rememorando o que eran». Tamén lembrou como a actual humanización de Jenaro de la Fuente substituíu espazos con lama e deteriorados por unha contorna renovada con «tres marabillosas fontes que marcan unha forma moderna».

Identidade da peonil

Caballero detívose especialmente na identidade propia da rúa Urzaiz no tramo do Calvario, popularmente coñecida como a peonil. «A xente do Calvario xa lle puxera un nome distinto. É a peonil. Ninguén lle chama rúa Urzáiz», comentou. Incluso bromeou coa posibilidade de cambiar oficialmente a denominación, aínda que, finalmente, apostou por deixar que sexa a cidadanía quen manteña vivo ese nome popular.

A futura Praza Begoña Caamaño ocupará o espazo xerado tras a demolición dun edificio deteriorado na entrada da rúa, unha actuación coa que tamén se conectou coa vía posterior e se gañou unha nova zona pública para a veciñanza. O alcalde enmarcou esta decisión dentro da vontade do Concello de conservar a memoria da autora e da evolución histórica do barrio.

Durante a súa intervención, Caballero enxalzou tamén o libro dedicado a Caamaño e coordinado por Ramón Nicolás, con ilustracións de Carlos Gallego, editado por Editorial Galaxia. Definiuno como «aparentemente un libro humilde, pero marabilloso» e destacou que divulgar a publicación é tamén «divulgar a Begoña».

O rexedor avanzou ademais que o volume será repartido por bibliotecas, centros educativos e distintos espazos da cidade para contribuír a manter viva a memoria da escritora. «Dentro de cen anos, seguirán rendindo homenaxe a Begoña Caamaño. A súa memoria permanece», afirmou.

Na inauguración de «Begoña Caamaño no Calvario vigués» participaron tamén Carmela Silva, tenente de Alcaldía; Gorka Gómez, edil de Cultura; Beatriz Caamaño, irmá de Begoña; Carlos Gallego, ilustrador; María Pereira, directora de Merlín Comunicación da Editorial Galaxia e unha representación da Asociación de Veciños do Calvario.

Suscríbete para seguir leyendo