Moaña «descobre» un singular bosque mediterráneo no castro de Montealegre

O xacemento castrexo de Montealegre, en Domaio, suma ao seu innegable valor histórico, cun poboado datado entre os séculos I a. C. e I d. C., un importante patrimonio ambiental que o Concello quere conservar e divulgar coa apertura da contorna ao público. O goberno local conseguiu recentemente a cesión da titularidade dos terreos, que ata agora correspondía á Consellería de Vivenda e Planificación de Infraestruturas.

Este sábado, representantes do Concello, coa alcaldesa, Leticia Santos, á fronte, e directivos da Comunidade de Montes de Domaio realizaron unha visita á zona acompañados polos especialistas David Álvarez Graña e Antonio Fernández Cordeiro.

O percorrido permitiu identificar as especies e elementos naturais que deberán terse en conta nos futuros traballos de limpeza e mantemento. Non en balde, o enclave conserva un bosque con trazos mediterráneos, pouco habitual tanto no Morrazo como no resto de Galicia. Os expertos explicaron que a orientación do xacemento e o seu illamento durante décadas favoreceron as singulares características desta masa forestal.

A rexedora destacou tras a visita a presenza de especies como o mirto silvestre, que podería constituír unha das localizacións máis setentrionais deste arbusto na Península Ibérica. O exemplar atópase baixo un alcornoque e entrelazado cun espino.

Outra das especies presentes na contorna, e cunha representación moi escasa no Morrazo, é a loura peregrina, moi difícil de atopar «fóra das dunas», ademais dun tipo de fento de orixe paleotropical. Na zona tamén poden verse alcornoques centenarios e «liques propios de bosques maduros ben conservados, como a peltigera, que mostra a existencia de trazos propios dun bosque mediterráneo».

Trátase de especies que desapareceron ou son moi pouco frecuentes noutros lugares da contorna. De aí o empeño que porá o Concello na súa conservación cando acometa o seguinte paso: limpar e acondicionar o recinto para facelo visitable. «Debemos facer compatibles as visitas coa conservación do importante patrimonio natural que se mantivo no enclave durante décadas», indican desde o goberno local.

Leticia Santos explicou, tras o percorrido, que «Montealegre sorprendeunos tamén polo seu patrimonio natural. Agora temos que ser capaces de limpalo e facelo visitable sen pór en risco aquilo que o fai especial».

Para iso, o Concello traballará en colaboración coa Comunidade de Montes de Domaio na planificación dos traballos de limpeza e mantemento necesarios, seguindo as indicacións dos especialistas para preservar as especies de maior interese.

Ademais, valorarase a instalación de paneis informativos que permitan aos visitantes coñecer e identificar esta riqueza natural, como xa ocorre cos elementos arqueolóxicos. O obxectivo é que a recuperación de Montealegre sirva para pór en valor tanto a súa historia como o seu singular patrimonio natural.

Subscríbeche para seguir lendo