O OUFF baixou o pano con emoción, talento e un público convertido en protagonista nesta 31ª edición

O OUFF · Ourense Filme Festival baixou o pano á súa 31ª edición cunha gala de clausura na que os premios compartiron protagonismo cos agradecementos, os recordos e, sobre todo, cun público que volveu encher de vida o festival. O Auditorio Municipal de Ourense reuniu a profesionais do audiovisual, premiados e espectadores nunha noite que puxo o peche a máis dunha semana de cine e encontros.

Noelia Rey e Luis Larrodera conduciron unha cerimonia dirixida por Iván Iglesias que percorreu o palmarés da edición. A noite comezou cos recoñecementos de Panorama Galicia, onde a ourensá Elena Seijo recibiu o premio á Mellor Interpretación por Walking Holiday. A mesma película volveu subir ao escenario pouco despois grazas ao galardón ao Mellor Guion, recollido polo irlandés Ciano Desmond. Ambos aproveitaron as súas intervencións para non esquecer a Palestina e trasladaron desde Ourense unha mensaxe que levou por uns instantes a mirada da gala máis aló do cine.

O palmarés continuou con Baixa a marea, de Óscar Villarroya, como Mellor Curtametraxe Panorama Galicia; Vital, de Amir Zargara, como Mellor Curtametraxe Internacional, e María Aparicio como Mellor Dirección de Panorama Galicia por Ás veces éntrame tristeza, outras veces rebelión.

Un dos momentos con maior carga emocional chegou coas palabras de Óscar Doviso. O responsable do festival recordou as películas, os encontros e as conversacións que pasaran por Ourense durante eses días, pero incidiu especialmente en quen ocupara as butacas. Reivindicou que era o público quen facía posible que o OUFF existise: quen enchía as salas, preguntaban, opinaban e terminaban por facer seu o festival.

A gala reservou tamén un lugar destacado para Jaime Lorente, que recibiu o Premio Ópera Prima polo mal fillo, e para Charo López, distinguida co Premio Especial OUFF en recoñecemento a toda unha traxectoria sobre os escenarios e ante as cámaras. Entre ambos os momentos, Escoitando Elefantes puxo música a unha noite na que a emoción se foi abrindo paso entre figuras e discursos.

Na Sección Oficial Internacional, Myrsini Aristidou recibiu o Premio Carlos Velo á Mellor Dirección por Hold Onto Me ,Jessica Reynolds foi recoñecida como Mellor Intérprete por The Wolf, the Fox & the Leopard e Cristian Mungiu obtivo o premio ao Mellor Guion por Fjord . O Premio Especial do Xurado recaeu na Maison deas femmes, que tamén conseguiu o favor do público internacional.

As dúas grandes Calpurnias pecharon o palmarés. KIRO foi elixida Mellor Película de Panorama Galicia, mentres que Club Kid, de Jordan Firstman, levou a Calpurnia á Mellor Película da Sección Oficial Internacional.

Despois chegou a despedida. A proxección do mal fillo puxo a último fotograma a unha edición que volveu demostrar que un festival era moito máis que unha sucesión de películas. Durante uns días, Ourense compartiu historias, conversacións e emocións fronte a unha pantalla. E cando se apagaron as luces do auditorio, quedou esa sensación que só deixan algunhas despedidas: a de que o cine se había marchado, si, pero só ata a próxima vez.

Subscríbeche para seguir lendo