A comida caseira para levar gaña protagonismo no verán

O verán cambia moitos hábitos, tamén os relacionados coa cociña. Con máis horas fóra de casa, menos ganas de acender os fogóns e a procura de opcións cómodas, pero de calidade, os establecementos de comida para levar convértense nunha alternativa cada vez máis presente en Pontevedra. Lonxe de limitarse a unha solución rápida, estes negocios reivindican unha oferta baseada en produtos caseiros, frescos e preparados con mimo.

En Como en casa Take Away, situado na rúa Uxío Novoneira, explican que a tempada estival adoita ser positiva para o negocio. Hadidjah e Ana, encargadas de atender o establecemento, contan cun sorriso que as vendas están a funcionar ben e que o verán afai ser un bo momento para este tipo de locais.

Entre todos os pratos dispoñibles, no seu establecemento hai un que destaca especialmente nestas datas: a ensalada. Un produto fresco, sinxelo e moi ligado aos meses de calor que se converte nunha das eleccións habituais dos clientes cando buscan levar a comida preparada a casa.

Unha situación similar vívese na Esencia Take Away, onde Eugenio Castaño confirma que este verán está a deixar boas sensacións en canto a vendas. Neste caso, os produtos que máis saída teñen son tamén as comidas frescas, coas diferentes opcións de ensaladas como as elaboracións máis demandadas pola clientela.

O responsable do establecemento sinala ademais que a maioría dos seus clientes son persoas da propia zona, veciños que coñecen o negocio e que recorren a el para solucionar unha comida mantendo a aposta por produtos elaborados.

O atractivo destes establecementos non se limita unicamente aos veciños. Uxía chegou desde Vigo xunto á súa nai para pasar o día en Pontevedra, aproveitando a xornada para facer compras, relaxarse e coñecer a cidade. Durante a súa visita decidiu apostar pola comida para levar, unha opción que valora especialmente pola calidade do produto local.

Para ela, a comida que se prepara en Pontevedra ten algo especial: defínea como unha cociña «caseira e feito con agarimo», unha característica que fai que mereza a pena parar e levar algún prato para gozalo despois con tranquilidade en casa. Aínda que recoñece que no seu caso non é un costume habitual, si considera que este tipo de establecementos ofrecen unha alternativa perfecta para días especiais, cando se busca comer ben sen renunciar á comodidade.

Subscríbeche para seguir lendo