Un milleiro de persoas sae á rúa na Estrada para reclamar «salarios xustos» e «vivenda digna»

A Estrada botouse á rúa para apoiar a manifestación convocada pola CIG co gallo de a folga xeral do 11N. Ao redor dun milleiro de persoas, segundo os datos ofrecidos pola Policía Local da Estrada, sumáronse a esta iniciativa, superando así a tamén multitudinaria manifestación convocada hai só uns meses no mesmo escenario pola situación do ensino.

A protesta, marcada pola choiva, arrincou na Praza do Mercado. Desde alí, a manifestación baixou pola rúa Pérez Viondi ata chegar á avenida Benito Vigo, con proclamas nas que se reclamaban cuestións como salarios xustos, vivendas dignas e pensións decentes. Tras percorrer un longo tramo pola N-640, a marcha virou pola rúa Castelao antes de regresar á Praza do Mercado pola peonil rúa Calvo Sotelo. De novo no punto de partida, léronse varios manifestos. Ao paso da mobilización foron varios os comercios que pechaban as súas porta spara reabrir despois.

Xosé Manuel Nogueira, representante da CIG, puxo o foco na problemática económica e social que atravesa a cidadanía, con especial atención ás dificultades para acceder á vivenda e á perda de poder adquisitivo dos traballadores. «É sanguento que haxa tantos locais e vivendas baleiras e, pola contra, tanta xente sen vivenda», sinalou. Neste sentido, defendeu a necesidade de regular os prezos e vincular os salarios á evolución do IPC para evitar que cada vez haxa máis traballadores pobres, persoas que, a pesar de ter un emprego, «non chegan a fin de mes».

Nogueira tamén reivindicou a necesidade de mobilizarse para defender os dereitos da clase traballadora e evitar que os intereses do capital prevalezan sobre as necesidades da sociedade. «Hai que escoitarnos e non pódese permitir que ou capital ande ás súas anchas», apuntou.

En canto á resposta á convocatoria na Estrada, mostrouse moi satisfeito e cualificou de «masivo» o seguimento da manifestación. «Tendo experiencia doutras ocasións e doutras mobilizacións, está sendo secundada masivamente pola xente», afirmou. Para o representante sindical, a participación demostra que a CIG acertou coa convocatoria, a pesar das críticas recibidas sobre a oportunidade de organizala. «A xente ten claro que hai que saír á rúa, que é a única forma de defender vos nosos dereitos como clase traballadora», concluíu.