Porto e UVigo reforzan a súa alianza para levar a economía azul do laboratorio ás empresas

A Autoridade Portuaria de Vigo e a Universidade de Vigo decidiron reforzar a súa colaboración para impulsar novos proxectos vinculados á economía azul, a investigación, a formación e o emprego. O presidente do Porto, Carlos Botana, e a reitora da UVigo, Carmen García Mateo, mantiveron este luns un encontro institucional no que repasaron as iniciativas que ambas as entidades desenvolven de forma conxunta e fixaron novas liñas de cooperación.

Un dos principais proxectos será un estudo encargado a un equipo universitario dirixido polo profesor Carlos Rodríguez para analizar o impacto socioeconómico que xera o Porto de Vigo e a súa área de influencia en relación coa alimentación. O traballo medirá variables como o emprego, o valor engadido e a dinamización comercial, con especial atención a sectores como a pesca fresca e conxelada, a froita e a conserva.

Durante a reunión tamén se abordou o reforzo da presenza da Universidade de Vigo nos órganos de traballo portuarios, entre eles os grupos vinculados a Blue Growth e o Consello de Navegación do Porto. O obxectivo é intensificar o intercambio de coñecemento entre o ámbito académico e a xestión portuaria.

A colaboración entre ambas as institucións apóiase ademais en proxectos desenvolvidos durante os últimos anos, entre eles PuertAlMar, MarENet, BlueFishing Training, SARIL, NaturPorts ou ImpulsaAzul, centrados en ámbitos como a investigación mariña, a capacitación pesqueira e portuaria ou a sustentabilidade.

Novas liñas de investigación

Porto e Universidade prevén agora abrir unha nova etapa de cooperación estratéxica en innovación, investigación aplicada e formación, con especial atención á auga, os ecosistemas mariños, a biodiversidade e a economía azul. Tamén colaborarán a través do Campus do Mar en iniciativas de divulgación e innovación oceánica.

Entre as novas propostas figuran proxectos para o tratamento de verteduras mediante solucións baseadas na natureza, a medición do ruído submarino e a avaliación conxunta de contaminantes en augas e sedimentos.

Botana e García Mateo ratificaron ademais a futura firma dun novo convenio para reforzar as prácticas de estudantes e investigadores no Porto de Vigo. A intención é estreitar a relación entre a formación universitaria e as necesidades reais das empresas do sector, adaptando mellor os perfís profesionais á demanda laboral.

Ambos os responsables coincidiron en sinalar que a colaboración entre Porto e Universidade permitirá transformar o coñecemento científico en valor ambiental, económico e social para Vigo e a súa contorna.