Un explosivo na sede de UXT en Vigo embaza a xornada de folga

Unha explosión na sede da UXT en Vigo embazou a pacífica xornada de folga xeral na cidade que ata entón estaba a transcorrer sen practicamente incidencias.

Os feitos ocorreron ao redor das 19.00 horas da tarde, cando se rexistrou un forte estalido no número 97 de García Barbón, onde un dos sindicatos participantes da primeira das mobilizacións secundadas en Vigo, a Unión Xeral de Traballadores, ten a súa sede.

Dous encapuchados vestidos de negro

O explosivo, que aínda se descoñece o tipo pero todo apunta a un petardo de gran potencia, rebentou a porta de entrada provocando unha fenda de gran tamaño nas instalacións. Polo momento, o único que se coñece é que se trataría de dúas persoas encapuchadas e vestidas de negro que foron vistas nas inmediacións da sede de UXT, onde foi colgado o artefacto.

Sospéitase, entre as hipóteses abertas, das ameazas que varios sindicatos recibirían durante a semana previa á celebración desta folga xeral, cuxo seguimento foi masivo por parte da cidadanía viguesa.

Ao lugar dos feitos trasladáronse efectivos dos TEDAX da Policía Nacional para tratar de identificar o artefacto e descartar outros impactos.

En canto ao resto da xornada, non se produciu detención algunha, si un par de persoas identificadas, e en canto ás incidencias, un grupo con simboloxía de Tropas de Breogán cruzou obxectos da obra da avenida de Madrid sobre a calzada e tamén en Martínez Garrido sen maior transcendencia.

Subscríbeche para seguir lendo