As corenta empresas exportadoras de Deza e Tabeirós-Montes concentran máis da metade da facturación local e case un terzo do emprego

A actividade das empresas con presenza nos mercados internacionais representa unha parte fundamental da economía de Deza e Tabeirós-Terra de Montes. As 40 sociedades identificadas como exportadoras no Ardán 2026 suman unha cifra neta de negocios de 863,6 millóns de euros, o que equivale ao 50,65% da facturación conxunta das 1.100 compañías incluídas no directorio, que alcanza 1.704,9 millóns. É dicir, un grupo que representa apenas o 3,6% das empresas concentra máis da metade do seu volume económico.

A súa importancia tamén se reflicte no emprego. Estas corenta sociedades reúnen 2.590 traballadores medios, o 29,6% dos 8.742 que contabiliza o directorio nas dúas comarcas. Ademais, xeran 177 millóns de euros de valor engadido bruto, unha magnitude que mide a riqueza producida pola actividade empresarial unha vez descontados os consumos intermedios.

Os datos pon de relevo a importancia que teñen as compañías con proxección exterior dentro do tecido produtivo local. A súa dimensión media é notablemente superior á do conxunto de sociedades recollidas no informe: mentres as exportadoras alcanzan unha facturación media de 21,6 millóns de euros, a media xeral das empresas de ambas as comarcas sitúase ao redor de 1,55 millóns. Tamén existen diferenzas importantes en emprego, cunha media de case 65 traballadores por exportadora, fronte a uns oito no conxunto.

Entre as principais empresas identificadas como exportadoras figuran as mesmas sociedades que encabezan boa parte dos rankings económicos das dúas comarcas. Nudesa, con sede en Silleda, lidera o volume de negocio, con 165,3 millóns de euros, seguida pola tamén silledense Frigoríficos Bandeira, con 86 millóns, e Martínez Otero Contract, da Estrada, con 81,1. Estas tres compañías suman por si soas máis de 332 millóns de euros de cifra neta de negocio.

A continuación aparecen Construcións e Obras Taboada Ramos, de Lalín, con 53,6 millóns; Coellos Galegos SLU, de Rodeiro, con 52 millóns, aos que se engaden 21,4 da súa cooperativa (Cogal); Tecglass, de Lalín, con 45,5; e Inasus, tamén lalinense, con 41,5. A relación inclúe a Cobideza , de Lalín, con 36 millóns de euros; Ferros Diego, da Estrada, con 27 millóns; Técnica de Carpintería en PVC (Teccarsa), de Forcarei, con 26,9 millóns; e Integracións Silleda, con 25,5.

A presenza de empresas de alimentación animal, industria cárnica, construción, fabricación metálica, maquinaria, carpintería industrial, vidro e comercio almacenista reflicte a diversidade de actividades das compañías vinculadas aos mercados exteriores. A exportación non se limita a un único sector, senón que alcanza a ramas produtivas con características e dimensións moi diferentes.

A repartición municipal mostra unha clara primacía de Lalín, con 16 empresas exportadoras, o 40% do total de ambas as comarcas. Entre elas figuran compañías industriais como Tecglass e Inasus, xunto a firmas de construción, comercio e actividades agroalimentarias. O municipio destaca así tanto polo número de sociedades como pola diversidade do seu tecido empresarial con proxección exterior.

Silleda e A Estrada contan con sete cada unha. No primeiro caso, o peso económico é especialmente significativo pola presenza da fábrica de pensos e o matadoiro da Bandeira, ás que se suma Integracións Silleda. A Estrada conta con Martínez Otero Contract e Ferros Diego entre os seus principais representantes, dentro dunha estrutura produtiva vinculada á industria, o comercio e os servizos.

Tamén resulta destacable o caso de Forcarei, que reúne cinco sociedades exportadoras, unha presenza significativa en relación co tamaño do seu tecido empresarial. Teccarsa figura entre as súas principais referencias, dentro dunha actividade industrial con capacidade para operar máis aló do mercado local. Vila de Cruces achega outras tres empresas á relación, mentres que Rodeiro conta con dúas: Cogal e a súa cooperativa, o que reflicte o peso da actividade vinculada á produción agrogandeira.

Outro aspecto significativo é a relación entre comercio exterior e xeración de riqueza. As empresas sinaladas como exportadoras achegan uns 177 millóns de euros de valor engadido bruto, aproximadamente o 40,2% dos 440,3 millóns xerados polo conxunto de sociedades de ambas as comarcas. A súa achega á riqueza empresarial é, por tanto, moi superior ao seu peso numérico, aínda que algo inferior á súa participación na cifra total de negocios.

O Ardán 2026 debuxa, pois, un tecido produtivo no que a actividade internacional concéntrase nun número reducido de compañías, pero cunha enorme influencia sobre a facturación, o emprego e a riqueza xerada. A presenza de grandes sociedades industriais e agroalimentarias explica boa parte dese protagonismo, á vez que empresas de menor dimensión contribúen a estender a actividade exterior a distintos sectores e municipios.

Subscríbeche para seguir lendo