O CEIP de Agolada organiza a campaña solidaria "Libros que alimentan"

O CEIP de Agolada organiza este xoves nun dos Pendellos do centro urbano a campaña solidaria «Libros que alimentan». A partir das 12.00 horas, as persoas que desexen colaborar poderán doar alimentos non perecedoiros no Pendello R e, a cambio, levar un libro «para seguir alimentando a túa imaxinación» indican desde o centro educativo. Con esta iniciativa o colexio quere sumarse á celebración do Día das Librerías e, de paso, aproveitar a afluencia á feira mensual do día 12 e recadar alimentos que serán repartidos entre as familias que o precisen.

Por outra banda, este centro educativo xa puxo en marcha outras campañas de fomento da lectura. A súa Biblioteca Ferreiroa está aberta a diversos talleres, nos que poden participar as familias, e o seu club de lectura Vai de parroquias! xa anunciou semanas atrás os libros para ler para o presente curso. Haberá un encontro entre os lectores e os autores destes libros. Este club, unido á iniciativa de Ángel Utrera coa súa «biblioteca aberta» durante o verán en Vos Pendellos, palían a inactividade da biblioteca municipal, pechada en 2012 debido ao plan de axuste económico.