A acampada de Vigo iniciará os labores de recollida o próximo 15 de novembro

Tras tres horas de arduo debate sobre o medio e o fin que supón unha acampada, os membros do asentamento da Alameda tomaron a decisión de empezar a recoller o vindeiro domingo 15. Isto non significa que a totalidade das tendas e toldos vaia a desaparecer esa mesma xornada, pois pola complexidade da recollida prevese que os labores poidan estenderse unha semana. Neste tempo seguirá funcionando o traballo das comisións, aplicando os protocolos empregados na súa subsistencia.

A pesar de que desapareza este movemento en físico, a actividade continúa. Os participantes xa están a buscar data e día para continuar coas asembleas e as accións de reivindicación en prol do dereito á vivenda.

Tamén seguen os labores de axuda a persoas sen fogar, migrantes ou colectivos vulnerables que quedan fóra do sistema polo funcionamento do mesmo. É a procura de aloxamento, contacto con colectivos sociais ou outras xestións para que aqueles membros que vivían á intemperie non teñan que volver ao mesmo punto.

Un mes e tres días

En Vigo o campamento clausúrase tras un mes e tres días de funcionamento. Os seus voceiros explican que a recollida é unha decisión unánime, pois a acampada era un medio e non un fin. Precisamente por iso, o máis de medio centenar de persoas puido constituír varios grupos de traballo cos que enfocar a súa loita de cara ao futuro. Non é unha organización pechada: todo o mundo pode incluírse cando considere necesario. «Ou noso traballo foi fundamental de cara á folga xeral, para visibilizar a necesidades de facer unha mesa social en Vigo e poñer na palestra as dificultades que sofren as colectivas vulnerables na xa imposible situación habitacional», sinala Jacobo Mouriño.

Actividades

Desde praza Compostela animan a seguir en redes sociais os comunicados da acampada, pois non cesan as actividades tras a convocatoria de folga xeral o próximo 11 de novembro.